Rolls-Royce med kontrakt på fire offshorefartøy til Tidewater

Tidewater er med sin flåte på rundt 400 fartøy verdas største leverandør av tenester til den globale olje – og gassindustrien.
- Vi er stolte over å kunne fortsette det gode samarbeidet vi har med Tidewater. Deira val av fartøy med Rolls-Royce design og utstyr viser at dei stoler på vår evne til å møte deira spesielle behov knytta til olje- og gassaktivitet på store havdjup, seier Per Kristian Furø, salssjef i Rolls-Royce si avdeling for Ship Technology Offshore.
Framdriftssystemet som vert brukt på Rolls-Royce design UT 755 CDL, inkluderer Rolls-Royce Azipull thrusterar med trekkande propellar for auka effektivitet. Dette er første gong denne typen propellar er valt for denne bestemte typen fartøy.
Rolls-Royce skal også levere power electric system, dynamisk posisjonering DP2, automasjons- og kontrollsystem, dekksmaskineri og generatorer.
Fartøya skal ha dieselelektriske framdriftssystem som oppfyller krava til Clean- Design standardane. Ein har i utviklingsarbeidet lagt stor vekt på at mannskapet skal ha det komfortabelt ombord. Eitt av måla har vore å redusere støy og vibrasjon ombord til eit minimum.
Fartøya skal byggjast ved Drydocks World Shipyard i Indonesia, og etter planen skal dei leverast i 2012. I tillegg er der opsjonar på fire fartøy til av same type.
- Vi er svært glade for å kunngjere at desse robuste fartøya no skal byggjast. Dei vil vere med på å styrke flåten vår slik at vi kan tilby kundane det siste innan offshoreteknologi. Fartøya kan operere i krevjande miljø over heile verda, seier Jeff Platt, Chief Operations Officer i Tidewater Inc.
Meir enn 650 UT-fartøy designa av Rolls-Royce er leverte eller er i produksjon rundt om i verda.